香港網絡大典
註冊
Advertisement
20090309 jade passage

家姐被炒潮文內容Apple CG(2009年3月9日《蘋果日報》副刊圖片)

Job

八婆! 你攪到我冇咗份工?(電影《家有囍事》截圖)

關心妍搞到我家姐無左份工》(或稱家姐被炒潮文家姐潮文)的惡搞文章,約於2004年11月開始在網上散播,內容大致上是某人指責關小姐耍大牌,留難其在名牌時裝店工作的姐姐,最終令她被解僱。儘管關心妍早已否認此事,但此文章仍不斷在網上回帶。有指這是瘋狂歌迷的報復行為[1],而在某些討論區則是網民惡作劇的行為。

例如在高登討論區,最先張貼這文章是一個叫「on9仔」(高登會員編號:106715)的會員,後來經過不斷回帶,這文章至今仍是高登的玩物。高登人多從欺騙網友觀看這潮文之中獲得快感,因而將文章改頭換面,或在潮文之前寫一些其他的事,再接駁至潮文,以達到愚弄別人的目的。

另外,從網上追查所得,發現原來原文並沒有第一句的「講起我就扯火啦」,而是「先旨聲明,這個是正經post,我真係有野想同大家講,等大家唔好盲目追捧呢d所謂既偶像」,而標題卻是「就係因為關心研條p.k.,搞到我家姐無左份工.....」。[2][3]

在高登中,此潮文為潮文之首。

原文[]

由於此文不斷被回帶,以致仔細看完文章的人不多,而文中亦有不少錯字,如第一段「收入不錯又定」、關心等。

先旨聲明,這個是正經post
我真係有野想同大家講
等大家唔好盲目追捧呢d所謂既偶像


我家姐一路都在太古廣場一間名牌做sales
間店有好多有錢人同名人幫襯
做了很多年,已經是senior
咁多年黎都好俾心機做,經理亦好like佢
因為收入不錯又隱定,家姐原本諗住同拍拖多年既bf結婚

咁多年黎我家姐好少俾人投訴
而且同好多大客既關係都唔錯
前排關心研去過我家姐間店幫襯
不過serve佢既不是我家姐,但佢一買就買左好多野

過左個幾星期,佢又再去間店行
上次serve果個Day-off, 咁我家姐就頂上serve佢
開頭已經好有禮貌介紹d新貨俾佢, 仲話俾折頭佢
佢就無乜反應,望一望另一堆客
果堆客係大陸人,三至四個,講野好大聲
關小姐就同我家姐講話可唔可以關左間鋪一陣
等佢揀衫
我家姐同我講,佢公司一向唔俾佢地咁做
驚做壞個頭,除非真係有乜大人物,好多記者好混亂先可以咁做
但佢見到關小姐黑口黑面,都識做話打電話去問一問老闆
老闆梗係話唔得啦,至多俾多d折頭她

咁關小姐就發老脾,鬧到我家姐一面屁
d說話勁難聽,又話自己買野既錢多過我家姐搵幾年既錢
我家姐都唔敢得罪佢,一味道歉

跟住關小姐就走左人,家姐就同老闆備案
老闆解左情況就無再追問

過左兩日佢接到老闆電話話收到complaint
話有人投訴佢態度唔好,唔理顧客感受
公司policy一向唔話俾佢地知係邊次事件
我家姐估黎估去都淨係得失過關小姐一人
總之俾老話左兩句

又過幾日,關小姐又黎
這次和件西裝友一齊,但好在成店都無其他客
我家姐怕又惹事,叫左個junior過去serve佢
點知條老西友係要點番我家姐serve..

根住關小姐就玩野,試衫,但話d衫俾其他人試過污糟
要開新衫試,我家姐雖然知公司唔俾咁做,
但怕左佢,唯有照做
點知試左兩三件,件件佢都要咁試又無話要
我家姐終於話唔好意思,其實唔可以咁做
(根本明知她玩野啦.....)
又係至多俾多d折頭佢
跟住佢件西裝友就鬧我姐話"係咪話我地無錢買你地d野?"
我家姐話唔係,但佢照鬧
鬧左十幾分鐘
d同事見咁幫手,又照鬧
最終打俾老闆備案

之後連收兩封warning letter
早兩日接埋大信封
年尾俾人炒左

修訂版[]

講起我就扯火啦
我家姐一路都在太古廣場一間名店做sales
間店有好多有錢人同名人幫襯
做了很多年,已經是senior
咁多年黎都好俾心機做,經理亦好like佢
因為收入不錯又隱定,家姐原本諗住同拍拖多年既bf結婚
咁多年黎我家姐好少俾人投訴
而且同好多大客既關係都唔錯
前排關心研去過我家姐間店幫襯
不過serve佢既不是我家姐,但佢一買就買左好多野
過左個幾星期,佢又再去間店行
上次serve果個Day-off, 咁我家姐就頂上serve佢
開頭已經好有禮貌介紹d新貨俾佢, 仲話俾折頭佢
佢就無乜反應,望一望另一堆客
果堆客係大陸人,三至四個,講野好大聲
關小姐就同我家姐講話可唔可以關左間鋪一陣
等佢揀衫
我家姐同我講,佢公司一向唔俾佢地咁做
驚做壞個頭,除非真係有乜大人物,好多記者好混亂先可以咁做
但佢見到關小姐黑口黑面,都識做話打電話去問一問老闆
老闆梗係話唔得啦,至多俾多d折頭她
咁關小姐就發老脾,鬧到我家姐一面屁
d說話勁難聽,又話自己買野既錢多過我家姐搵幾年既錢
我家姐都唔敢得罪佢,一味道歉
跟住關小姐就走左人,家姐就同老闆備案
老闆瞭解左情況就無再追問
過左兩日佢接到老闆電話話收到complaint
話有人投訴佢態度唔好,唔理顧客感受
公司policy一向唔話俾佢地知係邊次事件
我家姐估黎估去都淨係得失過關小姐一人
總之俾老闆話左兩句
又過幾日,關小姐又黎
這次和件西裝友一齊,但好在成店都無其他客
我家姐怕又惹事,叫左個junior過去serve佢
點知條老西友係要點番我家姐serve.
根住關小姐就玩野,試衫,但話d衫俾其他人試過污糟
要開新衫試,我家姐雖然知公司唔俾咁做,
但怕左佢,唯有照做
點知試左兩三件,件件佢都要咁試又無話要
我家姐終於話唔好意思,其實唔可以咁做
(根本明知她玩野啦.....)
又係至多俾多d折頭佢
跟住佢件西裝友就鬧我家姐話"係咪話我地無錢買你地d野?"
我家姐話唔係,但佢照鬧
鬧左十幾分鐘
d同事見咁幫手,又照鬧
最終打俾老闆 備案
之後連收兩封warning letter
早兩日接埋大信封
年尾俾人炒左

使用的情況[]

高登討論區[]

不少高登人士謔稱關心妍為「家姐殺手」、甚至稱關心妍為「家姐妍」、更有人把角色調亂,稱她為「家姐」等,可見某些人竟因此成為了關心妍的擁躉。加上高登擁有不少戀姊狂的人,令「家姐」一詞在高登更曖昧,也更受歡迎。[4]

高登人更將香港男歌手張學友著名流行曲之一《李香蘭》,譜上新詞,成為改編歌曲《李香蘭(家姐版)》。

在2007年12月29日,高登會員vagrant更發表家姐潮文文言版,以壯高登聲威,成為一時佳話。

在2010年1月7日,高登會員「我不懂唱歌」會員編號:205261,化名「阿希」打上電台節目《星空奇遇鐵達尼》,與麥潤壽分享家姐潮文。[5][6]

高登行政總裁林祖舜亦曾公開背誦家姐潮文:

HKiTalk[]

2008年7月6日,HKiTalk會員JT4686以「我家姐一路都喺太古廣場一間名店做sales」為題目,發表關心妍廣告的巴士於太古廣場門口經過的相片,最後因遭受其他會員反對而自行刪去帖子內容。[7]

Uwants休閒聊天[]

2009年1月22日,Uwants休閒聊天會員南非王子把這篇潮文重新發佈,更把帖子的主題命名為「今次我真係好嬲.....」 ,以吸引其他會員點擊。其後當然被其他會員識破該潮文,甚至有會員說他是在回帶和發佈虛假的消息。[8]

2009年6月9日,Uwants休閒聊天會員「Xmzn」把這篇潮文再次重新發佈,將帖子的主題命名為「好辛苦好痛 我真係唔多想做人 件事係咁...... 」 ,以吸引其他會員點擊。內容當中加入了 1.自己是個毒男,小時因被親生父母拋棄而被某夫婦領養 2.自己的媽媽跟第二個男人 3.甚麼事也不懂的老豆 4.三個從來沒有當自己是哥哥的細妹,其名為細妹a、細妹b、細妹c 5.對自己很好的家姐。 當中有數人認真回覆此潮文。 但不久後在第二頁被其他會員完全地識破此潮文。 有會員評論此潮文富有創作力,但如果能修飾文辭更佳!事關帖子

東方日報[]

2010年2月16日左右,高登會員「利物浦街」將家姐潮文的主角改為張敬軒[9],令《東方日報》誤信以為真並將事件上報[10]結果引來高登會員連番恥笑[11]

蘋果日報[]

《蘋果日報》報道娛樂圈秘聞的專欄《關仁隱事》,竟然在2012年1月19日將家姐被炒潮文當作秘聞,還杜撰出翌日偕夫尋仇的情節,被網民質疑該專欄一直以來的可信性。[12]

其它[]

無綫電視的《爆笑管家》曾先後於第23集及第39集引用了本潮文作為笑點。

第23集(2010年3月20日)對白:

  • 雪路:講起就扯火喇,你家姐就俾人炒喇!
  • 雛菊:潮文係無人信㗎!

第39集(2010年7月17日)對白:

  • 雪路:講起就扯火喇,你家姐一路都喺白皇呢間名校,日日收十幾個LB手袋好多年㗎嘛。嗰陣有車載,有得食,有仔嗒,巴閉過唔知幾多女大學生𠻹呀。

衍生作品[]

由於寫該潮文的作者不明,難以追溯版權;而此潮文更影響到其他討論區新聞組,因此衍生出不少網民改編作品。

2015年6月下旬,關心妍上載其新歌《關家姐》至YouTube。這首歌以2004年潮文關心妍搞到我家姐無左份工」為引子,講述11年以來關心妍因這段潮文所受的影響。

真確性[]

「關心妍國際歌迷會」在2007年8月初發出聲明,譴責發放關心妍潮文的網民。[13]關心妍本人亦於其網誌發表文章,抒發在多年內被網民惡意攻擊的感受。

2008年1月,由於有YAHOO網民在其網誌貼家姐潮文,導致關心妍在其個人網誌,發表《謠言止於智者》的文章,謂她不介意這些謠言,並希望發放謠言的人,改放多一點時間,留意身邊需要關心的人。

關心妍網誌《玉石小品集》截圖,原文已隨Yahoo! Blog關閉永遠消失

2008年3月27日,港台節目《Gimme 5》中,關現身說法,於大氣電波中回應有關傳言。

由於時代久遠,受害人「家姐」亦從未現身,故此難以證實真偽。不過有關心妍歌迷提出:假若潮文首發時間確實為2004年11月末至2004年12月初之間,且文中資料無誤,則關心妍存在不在場證據。

據考究,透過文中「過左個幾星期」、「過左兩日佢接到老闆電話話收到complaint」、「又過幾日,關小姐又黎」、「早兩日接埋大信封」等資料,可以推斷出關心妍三訪太古廣場,歷時大約兩至三個星期,從而推斷出事發時間不早於2004年10月末,亦不遲於2004年11月末。而關心妍2004年11月的星蹤表顯示,關心妍11月大部份的時間都在中國內地宣傳,故此不可能接二連三在太古廣場出現。

2004 年 11 月星蹤(bma.com.hk)[1]

29/11/2004 TVB MTV Shooting
28/11/2004 1400 Macau 回歸 show 記者
26/11/2004 順德Budweiser show
26/11/2004 2000 新城寶安show
21/11/2004 1900 順德SHOW
20/11/2004 1400 新城頒獎禮記者會; Budwiser Show(佛山南海)
19/11/2004 Budweiser Show廣州
17/11/2004 2115 新城大專 show(HKU)
14/11/2004 錄音
13/11/2004 1430 廣東省電台頒獎禮P/C
11/11/2004 1300 港台頒獎禮記者會; 雪碧紅人館 (珠海)
10/11/2004 北京大學MTV Channel
6/11/2004 佛山Budweiser show+記者會
4/11/2004 1200 903頒獎禮記者會
3/11/2004 1500 TVB8頒獎禮記者會<

2014年,在事件十週年時,關心妍再度在雅虎香港上,回顧事件對她的影響。[14]

註解

  1. 內地網站娛樂報導《關心妍粗口辱罵,朱孝天揮拳相向》,2005-2-1。 有消息指,該網友不肯就此罷休,並於近日將行動升級,將在網上轟炸式發佈關心妍的「惡行」,貼文者還聲稱對於姐姐受欺負感到不值,還呼籲大家不要盲目追捧所謂「偶像」,擺出一副對關心妍恨之入骨的態度。 對於有人針對性地連續對自己作出抨擊,關心妍透過唱片公司同事表示:「公司同事看到都當笑話,如果那個人再散播不實報導,這麼喜歡玩,大家就一起玩吧,我們(唱片公司)會採取法律行動。」 據唱片公司透露,曾有位男歌迷出席關心妍的宣傳活動時,對關心妍毛手毛腳,經常找機會摸關心妍身體的不同部位,又寫了很多「四級」情書給關心妍,令關心妍深受困擾。為免那人再傷害關心妍,歌迷會已拒絕該會員出席任何活動,可能因此而觸怒對方才引發這次事件。
  2. FightClub:[傳聞]關心研的不當行為
  3. Games Animation Forum:[FW]:就係因為關心研,搞到我家姐無左份工.....
  4. 參見高登姐姐俱樂部
  5. 聽日我會打比麥潤壽同佢講家姐潮文[重組] 2 [2]
  6. Youtube:柒頭青年潮文整蠱電話(上)Youtube:柒頭青年潮文整蠱電話(下)
  7. 有關帖子
  8. [3]
  9. 高登討論區:(證據確鑿)張敬軒罵人成性- 串過碼頭咕喱
  10. 東方日報:張敬軒否認擺款累sales炒魷,2010年2月16日。
  11. 高登討論區:[潮文上東方?]張敬軒金鐘累家姐sales炒魷
  12. 蘋果日報:關仁隱事:「攞錯嘢」偕夫名店尋仇,2012年1月19日。
  13. 關心妍國際歌迷會聲明:有關某人於網上發放關於心妍的宣傳消息, 2007-8-4。
  14. Yahoo! 娛樂圈:關心妍講家姐潮文︰我有上高登
Advertisement